frchito

GALAK NA SIYANG TULAK NG PANANAGUTAN

In Adviento, Simbang Gabi, Simbang Gabi 2015, Taon K, Uncategorized on Disyembre 20, 2015 at 16:11

yhst-37939424361191_2027_161446281SIMBANG GABI 2015 Ika-6 na Araw Disyembre 21, 2015

[TINAPAY NG SALITA NG DIYOS]

GALAK NA SIYANG TULAK NG PANANAGUTAN

Galak ang bumabalot sa ating liturhiya ngayon. Tuwa at pagtatanggal ng anumang bahid ng kalungkutan ang siyang laman ng mga pagbasa, patungkol sa figura o katauhan ng isang anak na babaeng dapat ay magalak at magsaya.

Iisa ang dahilan ng ganitong kagalakan – ang Panginoon, ani Sofonias, ay kapiling na natin, at wala nang anumang dapat ikatakot sinuman. Tulad ng sinabi natin noong isang araw, ang Banal na Kasulatan ay parang may replay, may teaser at may katuparan. Sa sulat ni Sofonias, isang anak na babae ang figura na binabanggit.

Sa ebanghelyo ang figura ng babae ay nagkaroon ng pangalan at walang iba ito kundi si Maria na siyang binisita ng Anghel at binigyan ng isang matinding balita at mabigat na pananagutan. Ito ang tanda ng tunay at panloob na kagalakan – hindi umuurong sa pananagutan, hindi nadadala ng takot at sumusuko sa mga suliranin.

Ito ang ginawa ng Mahal na Birheng Maria, na nagdumali at bumisita sa kanyang kagampang pinsan na si Isabel, na noon ay nagdadalang-tao rin at ipinaglilihi si Juan Bautista.

Isang malaking palaisipan sa ating lahat kung bakit nagkaganito ang bayan natin. Sa anumang aspeto ng buhay natin, marami tayong mga katanungan: kung bakit hanggang ngayon ay maduming politica pa rin ang nagpapatakbo sa lipunan … kung bakit ang kriminalidad ay hindi maampat, at kung bakit ang korupsyon ay lalong lumala sa lahat ng antas ng buhay, mapa sa gobyerno o sa labas ng gobyerno.

Malimit ay gusto nating sumuko. At hindi ko ipinagtataka kung bakit kay raming gustong mangibang-bayan, at lisanin na ang kanilang lupang sinilangan, at pumunta sa lugar na sumusunod sa batas ang mga tao. Pero, kung tunay na nanunuot sa atin ang magandang balita ng kaligtasan, kung totoong ang pananampalataya ay nagiging bahaging mahalaga ng ating buhay, marahil ay may maituturo sa atin ang Mahal na Birhen na hindi umurong sa pananagutan.

Galak na panloob at matimyas ang laman ng puso, hatid ng pananampalataya at pagtitiwala sa Diyos na mapagligtas. Ang galak na ito ay hindi ikinukubli, hindi itinatago, hindi sinasarili. Ang galak na ito ay hindi lamang namumutawi sa mga bibig, at lumalabas sa royal celebration at mga maiingay na inuman at sayawan.

Ang galak ay tulak sa serbisyo, paglilingkod, at pagmamalasakit sa kapwa. Ang galak ay tulak rin sa habag at awa, na siyang dapat nating bigyang-diin sa buong taong ito ng awa ng Diyos.

Papuri kay Maria! Luwalhati sa Diyos na nagtanghal sa kanya bilang isang huwaran ng galak na nagtulak sa tunay na paggawa at pagmamalasakit. May tatlong araw pa tayo upang higit na matuto. Sana’y magbalik pa rin kayo bukas hanggang sa matapos ang ating paghahanda!

Advertisements

Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out / Baguhin )

Twitter picture

You are commenting using your Twitter account. Log Out / Baguhin )

Facebook photo

You are commenting using your Facebook account. Log Out / Baguhin )

Google+ photo

You are commenting using your Google+ account. Log Out / Baguhin )

Connecting to %s

%d bloggers like this: